Lehen Hezkuntzako eta DBHko Erlijio Jardueren bidez Pastoraltza beti dago presente ikasgeletan. Horrela, ikasleekin hainbat jarduera lantzen ditugu, betiere ikaslearen adinari edo taldearen errealitate bereziari egokituta.

• Norbere ezagutzatik, beste pertsona batzuekiko harremanetatik edo munduan dauden arazoekiko kezkatik abiatuta, abestien, ipuinen edo beste testu batzuen bidez, gogoeta egiten dugu eta gure pentsamenduak partekatzen ditugu.
• Otoitz egiteko eta Jainkoarekin elkartzeko uneak antolatzen ditugu, baita sakramentu-ospakizunak, Eukaristiak eta Adiskidetzeak ere; ikasleek bizi duten guztia ospatzea eta fedean oinarrituta egin ahal izatea nahi dugu.
• Munduko egoera aztertzen dugu; ikasleek bidegabekerien aurrean nola sentitzen diren jakin dezaten eta haiei aurre egiteko zein urrats eman ditzaketen jakin dezaten saiatzen gara.

Jesusen Lagundiaren Kongregazio Orokorraren arabera, fedearen zerbitzua eta justiziaren sustapena bat eginik mantentzean datza elkartasuna. Jesuitak Indautxun elkartasuna lantzen dugu ikasleekin, hainbat kanpainen bidez:

• Gabonetako kanpaina: elikagaiak eta dirua biltzen ditugu Bilbon egoera ahulean dauden pertsonekin lan egiten duten elkarte batzuentzat.
• Bakearentzako eta Elkartasunarentzako Garaia: Jesusen Lagundiaren gobernuz kanpoko erakunde Alboanek garatzen dituen egitasmoak babesten ditugu.
• Hezkuntzaren aldeko Mundu Kanpaina: bat egiten dugu gobernuz kanpoko erakundeek, hezkuntza-arloko sindikatuek, ikastetxeek eta askotariko gizarte-mugimenduek osatzen duten koalizioarekin. Pertsona guztiek kalitatezko hezkuntza jaso ahal izatea bermatzeko Dakarreko Goi Bileran (2000) emandako hitza betetzen dela ziurtatzea da ekimen honen helburua.

Urtero egiten ditugu bizikidetzak eta erretiroak DBHko eta Batxilergoko ikasleekin. Eskolatik kanpo, ordu edo egun batzuez, ikasleekin bizi gara, elkar ezagutzen dugu eta hainbat gairi buruz hausnartzen dugu.

Batxilergoko 2. urtean, bizikidetzak Espiritu Ariketen sarrera dira.

Inaziotar Astean, Jesusen Lagundia eta jesuitak gure ikasleen artean are gehiago ezagutarazten saiatzen gara. Besteak beste, lagundiko pertsonaia historikoen bizitza partekatzen dugu, hala nola Loiolako Inazio Deunarena, Xabierko Frantzisko Deunarena edo Arrupe Aitarena, Bilboko jesuiten historia edo munduan bizi duten egoera. Klaustro bat antolatuz, asmo bera irakasleekin ere partekatzen dugu.

Ikastetxeko pastoralisten taldea gure ikasleen eskura dago, aurrez aurre, banaka hitz egiteko eta heldutasunerako bidean laguntzeko. Topaketa berezi hauen bidez, ikasleek sentitzen eta pentsatzen dutena, nahiak eta irrikak, partekatu ditzakete, baita beste pertsonekin duten harremana zein Jainkoarekin dutena ere.

Ikastetxearen pastoraltza proposamena Jesusen Lagundiaren Probintziak antolatutako jarduerek osatzen dute. Jardunaldi hauetan parte hartzea borondatezkoa da, eta bertan gure ikasleek antzeko kezkak dituzten beste neska-mutil batzuk ezagutu ditzakete. Hazten doazen heinean, gero eta gehiago nabarmentzen da premia handiena duten pertsonei lagundu beharra.

Hauek dira probintziako jardueretako batzuk:

• DBHko lehen eta bigarren zikloetarako elkargoen arteko topaketa.
• Batxilergoko 1. mailako gazteen topaketa.
• Batxilergoko 2. mailako Elkartasun Pazkoa.
• Adinekoak artatzeko Tuterako auzolandegia.
• Etorkinak diren familien seme-alabei laguntzea Gasteizen.

Gure garaiko ezbaien irakurketa analitiko batetik abiatuta, urtero, pastoraltzako talde batek hausnarketarako ideia nagusi bat proposatzen die jesuiten ikastetxeei. Jarraian, pertsona hauek eskola-etapa bakoitzari egokitutako materiala sortzen dute. Ikasleei gure gizartea hobeto ulertzen laguntzea da ekimen honen helburua, pentsamendu kritikoa sustatuz eta heltze pertsonalerako eta federako helburuak proposatuz.

Arrupe Elkartea Loiolako Inazio Deunaren espiritualtasunean oinarritutako gazteen gure kristau elkartea da. Ikastetxeari edo bere inguruari lotuta dauden 14 eta 30 urte bitarteko neska-mutilek osatzen dute. Ondoko beste jesuiten zentroetan ere badira Arrupe elkarteak eta haiekin esperientziak partekatzen ditugu.

Parte-hartzaileei giza eta kristau balioetan hazten laguntzea, eta elkarrizketarako, bakerako, tolerantziarako eta partaidetzarako jarrerak sustatzea dira Arrupe Elkartearen helburua. Halaber, fedea eta mundu hobe baten aldeko lanari lotutako Jesusen jarraipena ere lantzen ditugu.

Indautxuko Eskautak taldeak 1979tik dihardu 8 eta 18 urte bitarteko haurrak eta nerabeak aisialdian hezten. Hau guztia, naturako jardueren, talde txikien bizikidetzen, gaitasun pertsonalen garapenaren eta giza eta kristau balioen hazkundearen bidez egiten du elkarte honek.

Jesuitak Indautxuren pastoraltzaren proposamenetako bat da Euskaristia Santuaren Kofradia. Antolakunde hau 1948an sortu zuen ikasle ohi talde batek Vera Cruz kofradiaren filial gisa; 1959an bazkun propio bezala eratu zen.

Kofradiaren lanik nabarmenena Samintasunaren Andre Mariaren tronua da, baita “Jesus zutabeari lotuta” eta “Ecce Mater Tua” pausoak ere.

• Lanegunetan: 7:30 eta 13:15
• Larunbatetan: 9:00 eta 18:30
• Igande eta jaiegunetan: 10:00, 11:30 eta 13:00